Kovara Vate 81
Vate Dergisi 81
- Hûmare
- 81
- Rîpel
- 108
- Serre
- 2025
- Ziwan
- Kirmanckî (Zazakî)
WENDOXAN RÊ
Wendoxê delalî,
Na hûmara ma destpêkê serra 2025î destê şima ginena. Ma serra şima ya newa zerrîya safî ra pîroz kenê û hêvî kenê ke 2025 seba xebatanê ziwan û kulturê ma biba yew serra hîna başe.
Wendoxê delalî,
Sey serra parî emser zî Dîyarbekir de fuarê kitaban est bi. Fuarî 30ê teşrîna peyêne de dest pêkerd û 8ê kanûne de qedîya. Hema-hema heme weşanxaneyê kurdan û gelek weşanxaneyê tirkan yê girdî beşdarê fuarî bîy. Fuar de rotişê kitaban ra teber gelek aktîvîtyê bînî zî est bîy. Panel, semîner û dayîşşinasnayîşê kitaban nînan ra çend hebî bîy. Standê Weşanxaneyê Vateyî wendoxanê kirmanckî (zazakî) rê gelek balkêş bi. Bitaybetî rojanê şeme û yewşemeyan de standê Vateyî qet xalî nêbi. Wendox û nuştoxanê kirmanckî nê platformî de yewbînî dîy û nas kerd. Nuştoxanê Weşanxaneyê Vateyî ra M. Malmîsanij, Umer Barasi, Bedrîye Topaç, Şade Agon, Deniz Gunduz, Îdris Yazar, Dilo Bargiran û Îhsan Esparî kitabê xo îmza kerdî.
Wendoxê delalî,
Ma hûmara 80. de derheqê nuştoxanê kovara Vateyî de tîkê melumat dabi. Ma na hûmare de zî wazenê muhtewaya nuşteyanê 80 hûmaranê kovare ser o tayê agahîyan bidê. Labelê verê ganî ma yew melumatê xeletî rast bikerê. Ma hûmara 80. de, nuşteyê “Wendoxan rê” de, wina nuştbi: “…9 kesan zî 20 yan zî hîna zaf hûmaran de nuşto.” No melumat xelet o, rast wina yo: “…9 kesan zî 30 yan zî hîna zaf hûmaran de nuşto.” Nika ma bêrê muhtewaya 80 hûmaran ser: 80 hûmaranê kovara Vateyî de, 513 şîîrî, 140 hîkayeyî, 107 roportajî, 112 sanikî, 138 deyîrî, 94 meqaleyê edebî û kulturî, 230 fiqra û meseleyî, 45 cigêrayîş yan zî meqaleyê ziwan, gramer û rastnuştişî, 56 vîrameyîşî, 33 portreyê kesan, netîceyê 36 Kombîyayîşanê Kirmanckî, kunye û qapaxê 390 kitabanê kirmanckî û babetanê bînan de 38 nuşteyî ameyê weşanayene.
Wendoxê delalî,
Na hûmara ma de verê şima cigêrayîşê M. Malmîsanijî “Kirmancca Etimolojisine Doğru-XII”î wanenê. Şîîrê na hûmare Dilo Bargiran, Newzad Valêrî, Îdris Yazar, Bedrîye Topaç û Hêvî Xebarî nuştê. Îsmaîl Guvenî yew sanike newe ra nuşta, Ozcan Yilmazî zî yew sanika Samed Behrengî açarnaya kirmanckî ser. Açarnayîşo bîn zî J. Îhsan Esparî kerdo. Ey yew qismê kitabê Hesenê Metê “Gotinên Gunehkar” kerdo kirmanckî. Metnê bînî yê na hûmare, Mîhrîban Subaşi, Akman Gedîk û Şukru Derînî nuştê.
Heta hûmara bîne bimanê weşîye de!
- Hûmare
- 81 · 2025
- Rîpel
- 108
- Çape
- Çapa Yewine
- Ca û serre
- Îstanbul, 2025
- Ziwan
- Kirmanckî (Zazakî)













