Kitab yan nuştox
Kovara Vate 79

Kovara Vate 79

Vate Dergisi 79

Hûmare
79
Rîpel
128
Serre
2024
Ziwan
Kirmanckî (Zazakî)

WENDOXAN RÊ

Wendoxê delalî,

Hûmara newa ya kovara Vateyî ma pêrune rê xeyrêne ba! Verê ke ma nuşteyanê na hûmare bidê şinasnayene, ma wazenê behsê Kamil Sumbulê birûmetî bikê ke ey aşma sibate de Swêd de wefat kerd. Kamil Sumbul (01.01.1956–11.02.2024) yew merdimo biqedr, yew kurdperwero zerrîzîz, yew têkoşero çalak bi. O Çêrmûge de ameyo dinya û 1976 de Ankara de dest bi unîversîte kerdo. Êlula 1979î de dewaya rêxistinanê Rizgarî û Ala Rizgarî ra tepşîyayo. Verê Anqara de û dima zî Dîyarbekir de, ê şertanî tewr xiraban de, panc serrî û hîrê aşmî zîndan de mendo. Demo ke veredîyayo di serrî û heşt aşmî zî cezaya surgunî daya ey û ca de şawito Sêwaz. Kamil 1988 de şîyo Swêd. Swêd de vîrameyîşê xo yê zîndan û surgunî nuştê. Nê vîrameyîşî ey sey hîrê kitabanê cîyayan, hetê Weşanxaneyanê APEC û Vateyî ra neşr bîyî. Kamil heta roja peyêne pabesteyê îdealanê xo bi. Heme şertan de çîyo ke bawer kerdo vato, fikrê xo rewşanê tewr zehmetan de zî pawitê. Mavajê serranê 1980yî de demo ke zîndanê Dîyarbekirî de adir varayêne, Kamilî welatê xo Kurdistan û têkoşînê meşru yê Kurdistanî dadgehe de pawito û no pawitişê xo nuştekî dayo dadgeha îdareyê orfî yê Dîyarbekirî. Kamil Swêd de zî meseleyê kurdan de zaf hessas bi. Ey rewşa sîyasî, kulturî û komelkîya kurdan teqîb kerdêne. Demo ke Grûba Xebate ya Vateyî awan bî û kovara Vateyî weşanîyayî, Kamilî heme hetî ra na xebate destek kerde û hetê maddî ra kovara Vateyî rê zaf ardim kerd. Gama ke embazan biwaştêne ey rê sipas bikê, tim bi nefsqijî wina vatêne. “Şima bi na xebata xo ziwanê ma mergî ra xelisna, mi ra zî no yeno, ez wezîfeyê xo kena.” Ney ra teber Kamil nuşteyanê xo, yê keyepelanê kurdan de, tim ehemîyetê Grûbe û kovara Vateyî ser o vindetêne. Û verê wefatê xo wesî kerdbî ke seremonîya cenaza ey de Grûba Xebate ya Vateyî ra yew embaz qisey bikero. Embazanê Swêdî na wesîya ey arde ca, Îhsan Esparî seremonîya cenazaya ey de qisey kerd. Ma bi zerrîya safî benê hemparê keder, xem û xemgînîya famîlya Kamilê rehmetî û înan rê sebir û serweşîye wazenê. Wa ruhê Kamilê sînayeyî şa bo.

Wendoxê delalî,

Grûba Xebate ya Vateyî seba Kombîyayîşê Hîris û Hewtinî, mabênê tarîxanê 28.10.2023- 31.10.2023yî de, Dîyarbekir de kom bî. Nuşteyê na hûmare yo verên çekuyê nê kombîyayîşî yê. Seke şima vînenê Grûbe nê kombîyayîşî de zî gelek çekuyî munaqeşe kerdê û tayê çekuyê standardî pêşnîyaz kerdê. Xebata Grûbe dom kena, Kombîyayîşê Hîris û Heştinî zî Dîyarbekir de mabênê tarîxanê 21.06.2024 û 24.06.2024î de beno. Şîîrê na hûmare yê Oxir Sermîyan û Akman Gedîkî yê. Şukru Derîn na rey yewna nuşteyê bîyografîkî pêşkêşê şima keno. Meqaleya Menekşe Akalin ya na hûmare empatî ser o ya. Îdris Yazar bi beşê peyênî yê rêzenuşteyê xo na hûmare de ma reyra yo. Şadê Agon û Resul Yildirimî seba şima nuşteyê balkêşî nuştê. Mewzuyê nuşteyê Mihemed Kurdîyî, Dewrêşê Evdî yo. Beşê folklorî de deyîrê arêkerdeyî yê Rohelat Aktulumî û meseleya Mistefa Gomayijî ca gênê. Ma destpêkê yew hîkayeya J. Îhsan Esparî zî na hûmare de weşanenê.

Heta hûmara bîne bimanê weşîye de!

Hûmare
79 · Zimistan 2024
Rîpel
128
Çape
Çapa Yewine
Ca û serre
Îstanbul, 2024
Ziwan
Kirmanckî (Zazakî)

Tedeyî

Hûmarê bînî

Heme hûmarî ›

Weşanxane ra biwaze

Kovara Vate 79

Mesajo ke şawîyeno

Merhaba, Vate dergisinin şu sayısını temin etmek istiyorum: *Kovara Vate 79* Yardımcı olur musunuz? https://vatekitab.com.tr/ki/dergi/kovara-vate-79/

Mesaj programê şima de abeno; şima eşkenê verê şawitişî bivurnê. Keyepel de melumatê şima nêmaneno.