Kovara Vate 78
Vate Dergisi 78
- Hûmare
- 78
- Rîpel
- 104
- Serre
- 2023
- Ziwan
- Kirmanckî (Zazakî)
WENDOXAN RÊ
Wendoxê delalî,
Na hûmara peyêne ya serra 2023yî ya. Ma serrneweyê şima zerrîya safî ra pîroz kenê. Ma hêvî kenê ke serra 2024î seba xebatanê kultur û ziwanê kurdkî, biba yew serra hîna serkewta.
Wendoxê delalî,
Bêguman serra 2023yî de warê kulturî de gelek serebûtê musbet û menfîyî qewmîyayî. Ma wazenê behsê yew-di serebûtanê kulturîyan yê musbetan bikê. Seke şima zanê emser mabênê 16 û 24ê aşma kanûne de, Dîyarbekir de fuarê kitaban est bi. Reya peyêne Dîyarbekir de fuarê kitaban 2019 de organîze bibi. Coka weşanger û nuştoxan bawer û hêvî kerdêne ke fuar do serranê bînan ra hîna zêde wendoxan rê balkêş bo. Rasta zî wina bi. Labelê baldarîyêka hende zêde kesî nêpawitêne. Îsmaîl Beşîkçî, derheqê fuarê Dîyarbekirî de yew nuşte nuşto. Nê nuşteyî de ca dayo tayê zanayîşan ke ey berpirsîyarê fuarî ra girewtê. Beşîkçî nuseno ke emser new rojan de 510 hezar kesan fuarê kitaban zîyaret kerdo. Serra 2019î de kesê ke şîyê fuarê kitaban 190 hezar kesî bîy. Zafaneyê weşanxaneyê kurdan beşdarê fuarî bîy û çîyo hîna balkêş emser 400 nuştoxî beşdarê aktîvîteyanê fuarî bîy. Nê nuştoxan ra 300 hebê înan nuştoxê kurdan bîy. Weşanxaneyan nuştoxanê xo rê gelek panel, konferans û rojên îmzayê amade kerdê. Beşîkçî nuseno ke nê aktîvîteyê winasî averşîyayîşê têkîlayanê nuştox û wendoxan de yew tesîro gelek musbet kenê.
Wendoxê delalî,
Fuarê 2023yî semedê vilabîyayîşê kitabanê kirmanckî, semedê xurtbîyayîşê têkilîyanê wendox û nuştoxanê kirmanckî zî yew aktîvîteyo muhîm bi. Gelek wendox û nuştoxê kirmanckî destpêkî ra heta roja peyêne ya fuarî beşdarê aktîvîteyanê Weşanxaneyê Vateyî bîy, wendox û nuştoxanê ke caran yewbînî nêdîbî, uca rastê pê amey, yewbînî nas kerd. 23 û 24ê kanûne de nuştoxanê Weşanxaneyî ra M. Malmîsanij, Bedrîye Topaç, Umer Barasi û Deniz Gunduzî kitabê xo îmza kerdê. Heme rojanê fuarî de la bi taybetî ê rojanê îmza de gelek-gelek kitabê kirmanckî resay wendoxan. Weşanxaneyê Vateyî yew demê dergî ra pey kanûna 2023yî de panc kitabê kurdkî yê neweyî neşr kerdî. Goreyê melumatê wayîrê Weşanxaneyê Vateyî Deniz Gunduzî destpêkê 2024î de do çendna kitabî neşr bibî.
Wendoxê delalî,
Xeberêka weşe ya kitaban zî Silêmanîye ra amey. Peynîya serra 2023yî de hîrê ziwananê cîyayan de hîrê antolojîyê şîîranê kirmanckî amey weşanayene. Şîîrê tayê şaîranê kirmancan tercumeyê îngilizkî, spanyolkî û kurdkîya mîyanêne (sorankî) bîy. Derheqê nê antolojîyan de şima şîyêne nuşteyê Oxir Sermîyanî yê na hûmare biwanê. Ma na hûmare de ca danê beşê desinî yê xebata etîmolojî ya M. Malmîsanijî zî. Şîîrê na hûmare yê Necef Xanî Bayindur, Bedrîye Topaç, Akman Gedîk, Ozlem Guntaş û Adir Dêrsimij ê. Nuşteyanê Îdris Yazar, Mihemed Kurdî, Şukru Derînî ra teber, beşêk Mewlidê Mela Mehmed Elî Hunî, îlaweyê Mektuba Şîyêsine ya Seîdê Nursî na hûmare de est ê. Meseleyê na hûmare Îsmet Bor, Mistefa Gomayij û Îsmet Sîvereklî nuştê. M. Malmîsanijî di waranê cîyayan de di destnuşteyê Celadet Alî Bedirxanî seba na hûmara ma amade kerdî.
Heta hûmara bîne bimanê weşîye de!
- Hûmare
- 78 · Payîz 2023
- Rîpel
- 104
- Çape
- Çapa Yewine
- Ca û serre
- Îstanbul, 2023
- Ziwan
- Kirmanckî (Zazakî)













