Kovara Vate 73
Vate Dergisi 73
- Hûmare
- 73
- Rîpel
- 152
- Serre
- 2022
WENDOXAN RÊ
Wendoxê delalî,
Ma bi zerrweşîye hûmara 73. ya kovara Vateyî pêşkêşê şima kenê. Yew taybetmendîya na hûmare est a, serrgêra 25. ya kovara Vateyî hamnanê 2022yî de ya. Seke şima zanê hûmara Vateyî ya yewine hamnanê 1997 de weşanîyaye. Bêguman 25 serrîya kovara Vateyî yew analîzê zaf hîra û xorînî heq kena. La ma tîya bi çend çekuyan serrgêre anê vîrê şima. Bi emirdergîye û bi muhtewaya xo kovara Vateyî rispêneya ma pêrune ya. Kovara Vateyî nasnameyê ziwanê ma, sînayaya ciwan, cinî û camêrdanê ma û berhemêda kolektîf ya nuştox, wendox û heme kedkaranê ziwanê ma ya. Nê vîst û panc serran de kovare de ziwan, tarîx, edebîyat, kultur, folklor û sewbîna gelek babetanê bînan de zaf nuşteyê erjayeyî weşanîyayî. Hûmara nuştoxanê kovare rewna hîrê seyî ra vîyarta û 73 hûmarê kovare nêzdîyê des hezar rîpelî yê.
Wendoxê delalî,
Verê verkan semedê 25 serrîya Vateyî ra ma şima rê sipas kenê, çunke na rewşa welatê ma de eke heskerdiş, kede û fedekarîya şima nêbîyêne, 25 serrî bêmabên domnayîşê weşanî mumkun nêbîyêne. Ma sipasdarê şima heme nuştoxanê xo yê zî, şima bi sebir na xebate domnaye; her nuştoxî/e bi zanayîş, tecrube û qabîlîyetê xo, warê xo de eserê edebî, ziwanî ûêb afirnayê û rîpelanê Vateyî de pêşkêşê wendoxan kerdî. Keyeyê înan hezar reyî awan bo tayê sînayoxanê ziwan û kulturê ma zî kovara ma rê hetkarîya maddî û manewî kerde. La çi heyf ke erdê ma ser o çerxê asîmîlasyonî hema zî bêvind gêreno û tewir bi tewir dişmenîya ziwan û kulturê ma roje bi roje hîna vêşî bena coka karê ma hema zaf-zaf o. Ma bawer kenê ke şima pêro ewro ra pey zî bi wendiş û nuştişê xo, bi herînayîş û vilakerdişê kovare wayîrîya kovara xo kenê û verê ra hîna vêşî destek danê kovare.
Wendoxê delalî,
Hûmara 72. de M. Malmîsanijî tayê îdîayanê nerastan û tayê negeyan ser o yew nuşte nuşt, nê nuşteyî de ê îdîayî çarçewaya îlmê ziwanî de û goreyê rastîya ziwanê ma munaqeşe kerdê. Dima Roşan Lezgînî sey cewabî nê nuşteyî keyepelê xo de yew nuşte vila kerd. Nuşteyî xo de herinda ke wayîrîya îdîayanê xo biko, înan munaqeşe biko, temamen çarçewaya munaqeşeya ziwanî ra dûrî kewt, negeyê neweyî hem kerdê M. Malmîsanijî hem zî sewbîna embazanê Grûba Xebate ya Vateyî. Coka şima na hûmara de zî verê nuşteyê M. Malmîsanijî “Zurnameyê Roşan Lezgînî” wanenê. Ugur Sermîyanî seba na hûmara ma Dêrsim ra çend roportajê balkêşî şawitî. Muzaffer Bahçivanî Yilmaz Guneyî ser o yew vîrameyîşê qeçekîya xo nuşto. Resul Yildirimî bi nameyê “Destanê Birayê Mi” yew nuşte nuşto. Endamê Grûba Xebate ya Vateyî Îbrahîm Bîngolî, yew weşanê Unîversîteya Artukluyî de bi nameyê “Zazacada İmla Kurallarında Yapılan Yanlışlıklar” yew nuşte nuştbi. Ê nê nuşteyî de tayê qerarê Grûba Xebate ya Vateyî rexne kerdbîy. Nuşteyê M. Malmîsanijî “Kirmanccada İmla Kurallarını Tartışırken”o ke ma na hûmare de neşr kenê, derheqê rexneyanê Bîngolî de yo. Munzur Çem netîceya Kombîyayîşê 34. yê Grûba Xebate ya Vateyî ser o vindeto û tayê çekuyê herêma Dêrsimî ke kombîyayîşî de pêşnîyaz nêbîbîy, ma rê şawitê. Afat Yalinkayayî toponomîya çend dewanê Licê ser o yew xebate kerda. Ma na hûmare de ca da na xebate zî. Di meseleyê Îsmet Borî, yew sanika Mistefa Gomayijî, derheqê newroza domanan de yew xebera Îbrahîmê Xaşxaşe zî na hûmare de est ê. Şîîrê na hûmare, J.Îhsan Espar, Ozlem Guntaş û Cemal Evdilnasir Sertî nuştê. Hîkayeyê na hûmare yê Hesenê Metê û Akman Gedîkî yê.
Heta hûmara bîne bimanê weşîye de!
- Hûmare
- 73 · Hamnan 2022
- Rîpel
- 152
- Ca û serre
- Îstanbul, 2022













