Kitab yan nuştox
Kovara Vate 75

Kovara Vate 75

Vate Dergisi 75

Hûmare
75
Rîpel
144
Serre
2023
Ziwan
Kirmanckî (Zazakî)

WENDOXAN RÊ

Wendoxê delalî,

Ma zî sey şima zaf-zaf xemgîn îme. Ma dej, elem û qesawetê pêro afatzedeyan zerrîya xo de hîs kenê. Wa ruhê heme rehmetîyanê erdlerzî şa bo, cayê înan behişt bo! Homa sebir û metanet bido yê mendeyan. Ma birîndaran rê zî şîfaya xeyrî wazenê. Erdlerzo ke 6ê sibate de Kurdistanê Vakur û Rojawanî de cirîya beşêkê welatê ma rasta zî wêran kerd, dades bajaranê ma de tayê awanî yan pêro ameyê war, herre û wele bîy yan zî qismen rijîyay û wina zirar dîy ke şarê ma êdî nêşêno tede bimano. Na xafila bêgumane tena banî û bînayî nêkerdê xirbî, binawanîya bajaran zî herimnaye; mavajê rayîrî, şebekeyê awe, elektrîk û kanalîzasyonê bajar, qeza û dewan yan temamen yan zî beşêk xirab kerdê. Werrekna tesîrê na felaketa nêdîyaya tena bi nê texrîbatanê fizîkîyan sînorkerde bibîyêne. Birîna tewr xorîna ke erdlerzî komelê ma de peyda kerde, wefatê hende merdiman o. La na trajedî ra zî pîlêre a bî ke bi rojan rayapêroyî qîrî û hewara hemwelatîyanê ma binê ê xirban ra goşdarite. Dezgeyê dewlete çend rojanê verênan de nêşîy hewara înan, wexto ke şîy zî êdî berey bi. Yew çîyo temaşe yo, 40 rojî yo ke welatê ma de na bobelate qewmîyaya, la hema zî çi kes nêzano nê erdlerzî de çend kesî merdî çend kesî vîndîbîyaye yê û çend kesî birîndar ê. Dezgehê dewlete tay hûmaran eşkera kenê la rayapêroyî bi nê agahîyan bawer nêkena. Beno ke ma caran nêmusîme kanî nê erdlerzî de çend merdiman dinyaya xo bedilnaye.

Wendoxê delalî,

Bêguman no erdlerz do hema gelek hetan ra bi yew hawayo menfî tesîrê komelê ma biko. Des-pancês mîlyon merdiman nê erdlerzî ra zirar dîy, mexdur bîy. Cayê ke nê afatzedeyî tede sitar bibîy çin ê, hema zî gelek kesî muhtacê yew kone, yew loqmeyê nanî û yew tasa aw ê. Şar bêhêvî û bêçare yo. Coka kesê ke îmkanê înan est ê, koç kenê tayênan zî dewlete bena cayanê cîya-cîyayan de îskan kena. Erdlerzê hurdîyê ke hema vaje her roje benê û spekulasyonê ke do nêzdî ra erdlerzê neweyî û hîna girdî bibîy, benê sebeb ke şar bi panîk warê xo terk biko. Demografîya komelê ma xora verê rîyê polîtîkaya dewlete ya zulmkare û şovenîste ra gelek vurîyabî. Êdî her kes zano ewro hîrê ra yewê nufusê kurdan erdê xo ser o nêciwîyêno la no erdlerz şîyêno bibo sebeb ke no nîsbet demêde kilmî de gelek zêde bibo. Na rewşe zî bena sebeb ke şarê ma nasname, ziwan û kulturê xo ra hîna dûrî bikewo, hîna rew asîmîle bibo.

Wendoxê delalî,

Nuşteyê na hûmare yê verênî wefatê embazê ma yê erjayeyî Munzur Çemî ser o yê. Babeta nuşteyanê Cemîl Gundogan, Ugur Sermîyan, Îbrahîmê Xaşxaşe, Haydar Diljen û Şukrî Derînî nuştoxî û cuya Munzur Çemî ya. Grûba Xebate ya Vateyî semedê Kombîyayîşê 35. ra mabênê tarîxanê 05.08.2022 û 08.08.2022yî de, Dîyarbekir de kom bî. Na hûmare de ma netîceyanê xebata nê kombîyayîşî neşr kenê. Haydar Diljenî hamnanê 2022yî de waya Faîk Bucakê rehmetî Edalet Kandemira 96 serra zîyaret kerda. Înan gelek babetanê cîyayan ser o qisey kerdo. Na hûmare de şima qiseykerdiş û terraqa înan zî wanenê. Beşê dîyin yê vîrameyîşanê birêz Mehmud Nêşîteyê rehmetî zî na hûmare de ca gêno. Nuşteyê bînî yê na hûmare yê Menekşe Akalin, Resul Yildirim û Enwer Yilmazî yê. Şîîra na hûmare Îdris Yazarî nuşta.

Heta hûmara bîne bimanê weşîye de!

Hûmare
75 · Zimistan 2023
Rîpel
144
Çape
Çapa Yewine
Ca û serre
Îstanbul, 2023
Ziwan
Kirmanckî (Zazakî)

Tedeyî

Hûmarê bînî

Heme hûmarî ›

Weşanxane ra biwaze

Kovara Vate 75

Mesajo ke şawîyeno

Merhaba, Vate dergisinin şu sayısını temin etmek istiyorum: *Kovara Vate 75* Yardımcı olur musunuz? https://vatekitab.com.tr/ki/dergi/kovara-vate-75/

Mesaj programê şima de abeno; şima eşkenê verê şawitişî bivurnê. Keyepel de melumatê şima nêmaneno.